UNA-Bloque por Asturies aclara su posición sobre la investidura de alcalde en Carreño

Ayuntamiento de Carreño -Foto Asturias Verde-

COMUNICÁU D'UNA-BLOQUE POR ASTURIES
Ante la rabasera de mentires y manipulaciones interesaes contra la nuesa organización al respecto de la próxima sesión d'investidura del alcalde de Carreño, Unidá Nacionalista Asturiana quier dexar clares les siguientes cuestiones:
a) los únicos responsables de qu'Ángel Riego vaya siguir siendo l'alcalde de Carreño son les persones que lu votaron. Pretender echar la culpa d'esti estremu a la nuestra organización, que sólo tien un conceyal, ye una absoluta falacia que nun podemos consentir. Y esta falacia vien espardida intencionalmente dende sectores conservadores que, nun siendo capaces a ponese d'acuerdu ente ellos, cárguenmos el muertu a nosotros.
b) esta organización decidió por unanimidá en dos asamblees, celebraes hai más de 15 díes, que'l nuestru conceyal votaríase a sí mesmu na sesión d'investidura. Ante los malos entendíos surdíos, volvimos a celebrar otra asamblea ayeri pa ratificar la nuestra postura.
c) apoyar un gobiernu de PP-Foro en Carreño ye una falta de respetu a los nuestros votantes. Si ente ellos, hai alguna persona que nos votó pensando que díbemos pactar con quien seya y a costa de lo que seya con tal que quitar a Riego, equivocóse. Ésa nun ye la nuestra forma d'actuación. Quien quiera que gobierne la derecha, que vote a la derecha, non a UNA.
d) nun hai ninguna garantía nestos momentos de qu'un Gobiernu de PP-Foro vaya ser menos perxudicial pa Carreño que'l d'Ángel Riego. Los posicionamientos del PP en temes como'l mediu ambiente, l'urbanismu o la cultura asturianu nun tienen nada que ver colos nuestros. En materia medioambiental, cabe recordar que'l PP (partíu del que provién Foro Asturias) tien exactamente la mesma postura que'l PSOE: presumen de defender los intereses del conceyu, mientres les sos direcciones autonómiques apoyen toles agresiones contra Carreño: incineradora, regasificadora, desmonte del alto aboño... En materia urbanística, sólo hai que ver conceyos como Gozón, Uviéu o Villaviciosa pa desconfiar de la forma d'actuación d'esti partíu. En materia de llingua asturiana, nun hai ningún conceyu del PP, salvando'l de Villaviciosa, que cuente con Serviciu de Normalización Llingüística. Nun tenemos ninguna razón oxetiva pa apoyar un gobiernu d'esti partíu.
e) ye absolutamente falso qu'hubiere un consensu de cuatro partíos (PP, FAC, UICA y CAUN) pa quitar l'alcaldía a Ángel Riego. Ningún d'ellos lo tenía claro, y nengún d'ellos dio nunca'l so vistu buenu definitivu. Agora toos escurren el bultu pa carganos el marrón a nosotros. El primeru que ta aliviáu de llibrase de la responsabilidá de Gobernar ye'l PP. El so propiu candidatu, José Ramón Rodríguez, confesónoslo personalmente. Agora que nun vengan con cuentos.