Unidá Nacionalista Asturiana esixe al equipu Gobiernu qu’opte a los fondos del 1% Cultural

Obras de ampliación del Puerto de Gijón o El Musel -Foto AsturiasVerde- Nota de prensa de Unidá Nacionalista Asturiana de Carreño La llei de Patrimoniu Históricu establez la obligatoriedá de destinar, nos contratos d’obres públiques, una partida de polo menos el 1% a trabayos de meyora del Patrimoniu Históricu. El conocía como 1% cultural xenérase reservando esi porcentaxe de los fondos aportaos pol Estáu nos presupuestos de cada obra pública financiada total o parcialmente pol Estáu, y cuyu presupuestu supere los 600.000 €. El requisitu esixíu pa optar a ellos ye que cumplan la finalidá pa que tan destinaos, esto ye: 1. Que se destinen a trabayos de conservación, rehabilitación, restauración o consolidación. 2. Que contribuya al enriquecimientu del patrimoniu históricu mediante l'adquisición de bienes culturales, esposiciones o publicaciones. 3. Que fomente la creatividá artística, al traviés de l’adquisición d’obres d’autores vivos, o encargos a estos. A día de güei, son ya munchos los conceyos que se beneficiaron y solicitaron estos fondos. N’Asturies, el conceyu Gozón recibió fondos destinaos a meyorar el Muséu Marítimu, o gracies a ellos recuperóse'l Faru de Peñes. Xixón destinó la mayoría de los fondos recibidos pa la Orquesta Sinfónica. Castrillón destinó fondos pa rehabilitar el Monasteriu de la Merced, en Raíces. Cuideiru va recibilos pa recuperar el Faru y los accesos a él. L.Luarca recuperará una antigua casona pa instalar la Casa de les Ciencies. En Villaviciosa rehabilitaráse la Ilesia de San Salvador de Valdediós. Incluso'l Principao, qu'invirtió gran parte de los fondos que reclamó de l'ampliación del Musel na obra megalómana de la Universidá Llaboral, que va camín de convertise na pirámide de Keops del Faraón Tini Areces. Pola nuestra parte, en Carreño, a pesar de sufrir gran parte de les consecuencies d'obres inútiles ya innecesaries como l’ampliación del Musel (la obra pública más cara de la Historia d’Asturies), sigue si reclamase nin optase a esos fondos. Dende UNIDÁ NACIONALISTA ASTURIANA (UNA), criticamos la falta d’ambición, d’idegues y de sensibilidá del Gobiernu Municipal, que ve cómo'l Patrimoniu Históricu, Cultural y Artísticu sigue olvidao, sigue cayendo y sigue deteriorándose, y que colos fondos del 1% cultural podría ser una bona manera de recuperalo. Dende UNIDÁ NACIONALISTA ASTURIANA esiximos a PSOE-IU que se pongan les piles y trabayen en beneficio de Carreño, y qu’entamen a reclamar el 1% Cultural d’obres ya entamades como l’ampliación d’El Musel, o d’obres qu'anuncien facer como la Regasificadora o l’autovía d’accesu a El Musel. Obres que dende UNA rechazamos por innecesaries estratéxica, social y ambientalmente, pero de les que vamos esixir lo que nos correspuende por llei. Con estos fondos, podría llevase a cabu la rehabilitación d’elementos Patrimoniales en seriu pelligru como’l Torruxón de Priendes o de Yebio (qu’apaez na Llista Roxa del Patrimoniu, y que desapaecerá en poco tiempu si non s’actua), el yacimientu tumular del Monte Areo, o'l Castru la Barrera. Podría ayudar a llevar alantre proyeutos llargamente demandaos como'l Muséu de la Pesca y la Industria Conservera, l’ampliación del Muséu Antón, o l’ampliación y rehabilitación de los Murales al Aire Llibre de Candás. UNIDÁ NACIONALISTA ASTURIANA
Publicar un comentario

Nuestro Facebook: Carreño Actualidad